: كلام مهم عن المذاكرة وسريع .... ولو نفذت ابقى قابلنى لو كلمة وقفت امامك فى الامتحان باذن الله

بسم الله الرحمن الرحيم

كلام مهم عن المذاكرة وسريع

بقلم: د.شريف عرفة..

الامتحانات قربت و كل سنة و انتم طيبين يا شباب ..
بالمناسبة دي هاكلمكم النهاردة عن الذاكرة.
لو عايز تحسن ذاكرتك هاديلك شوية حاجات قالتها مجلة (Good Living-issue 11) ممكن تساعدك.. و أضفت عليها شوية حاجات كده, من وحي خبرتي في عالم المذاكرة:

الأكل:

لازم تهتم بالأكل , و خصوصا الأكلات إلي ممكن تحسن أداء الذاكرة.. مثل :
التمر- اللوز- الحليب- التفاح –العتب الغامق- و كل مشروبات الصويا..
و كمان العسل و شاي الجنزبيل و عصير الجزر محفزات رائعة للذاكرة...
و تجنب الكحول و المخدرات طبعا, لأنها بتضيع الذاكرة !!!

النوم:

فيه بعض الأبحاث بتقول إن النوم هو مرحلة بيقوم فيها العقل بتثبيل المعلومات إلي خدناها طول اليوم .. يعني يفضل سيادتك تنام بعد المذاكرة شوية بدل ما تفضل سهران الليل بطوله و انت مش مركز و قاعد تذاكر برضه !
الراحة مهمة و لازم تذاكر و انت مركز , و تنال قسط مناسب من النوم.. بس إوعى يبقى النوم هي و سيلتك المفضلة للهرب من المذاكرة ... انا باقول نام لك شوية بعد ما تذاكر مذاكرة كتيرة..

التنظيم:

مهم جدا قبل ما تذاكر , ترتب الورق و المذكّرات و الكتب بتاعتك.. كل مادة لوحدها و كل جزء لوحده.. عشان تعرف بالضبط (حجم) كل مادة..عشان تعرف بالضبط فاضل لك إيه و ذاكرت ايه فتقدر تعرف هاتذاكرها في وقت أد إيه.
التنظيم نص المذاكرة.. لأن الورق لو كله على بعضه , مش هاتعرف تذاكر و هاتيأس و تسيب المذاكرة و تقوم..لأنك مش عارف راسك من رجليك.. خليك فاكر : التنظيم نص المذاكرة.

الألحان :

لو فيه معلومة معصلجة مع سيادتك و مش عارف تحفظها, غنيها !
أيوه .. لو حاولت تفتكر كلمات أغنية .. مش هاتعرف تفتكرها إلا لو افتكرت اللحن, ساعتها هايبقى سهل تفتكر الكلام ..
الألحان بتخلي الحفظ أسهل.. مش ملاحظ إن بتوع الإعلانات بيحطوا اسم المنتج في أغنية ؟
عرفت ليه ؟
عشان الناس تحفظها !!

مثال :
إعلانات أرقام الانترنت .. أكمل الأغنية : 0777(و بعدين ؟)

بلاش لخبطة:

أي عمل غير منته في حياتك , ممكن يخلي بالك مشغول..
فضي نفسك للمذاكرة و بلاش تخلي بالك مشغول في 5638 حاجة !

الضحك :

الحاجات المضحكة عمرها ما بتتنسي..
لو فيه معلومة معصلجة معاك حطها في نكتة او بص لها كإن دمها كفيف ..
اخترع النكت و اسخر من المنهج اللي بتحفظة هاتلاقي نفسك بتحبه و عارف تذاكره..

مثال :

كنا بندرس عن عالم كبير اسمه (مالبيجي) و كان اسمه رخم و مش عارف احفظة.. أول ما تخيلت انه اسمه (مليجي) بس خواجة.. لقيت العملية سهلة الحفظ !

اهتم:

من المهم أن تكون مهتما بما تقرأ.. يعني حاسس انك عايز تعرف المعلومة دي فعلا و عايز تستفيد منها..خليك حاسس بالفضول نحو الموضوع عشان تلاقيه مسلي.. و حط دماغك في الموضوع ..

قرر:

قرر إنك هاتحفظ المنهج بنسبة 100% مهما كلفك الأمر , و ذاكر بهذه العقلية و انت مصمم إن : يا انا يا الأمتحان بقى !
سبب رئيسي بيخلينا مش عارفين نحفظ , و هو اعتقادنا الداخلي ان ذاكرتنا ضعيفة !
لو آمنت ان ذاكرتك قوية و قلت كده لنفسك , و قررت إنك هاتحفظ و تستوعب المنهج كله بأقل تفاصيله, هاتترسخ جواك الفكرة دي .

خليك إيجابي:

حط خطوط تحت الكلام المهم , لخص النقاط المهمة , سمع لنفسك , ..... اعمل حاجات ملموسة تحس منها إنك ماشي في الطريق الصحيح و مش سلبي.

ركز في التفاصيل:

اعتبر كل معلومة صغيرة مهمة .. و اعتبر انك هاتحكي كل التفاصيل دي لواحد صاحبك بكرة و انتم خارجين مع بعض.. اعتبر إن فيه ناس صحابك عايزين يعرفوا التفاصيل دي و انك هاتحكيهالهم بكرة..
و خلي بالك ..
ادي نفسك فرصة انك تنسى شوية .. كل ما تذاكر كتير, هاتنسى حاجات مش مؤثرة قوي..
لكن لو مذاكر قليل, لو نسيت معلومة واحدة هاتروح في أبو نكلة !

اتكلم بصوت عالي :

بكده حواس كتير هاتشتغل على المعلومة دي .. اشرح المعلومة دي لحد , أو اكتبها و اقراها تاني .. ماتبقاش بس مستقبل سلبي للمعلومة, طلعها من جواك برضه -بأي طريقة- عشان ترسخ المعلومة أكتر.

المراجعة :

بعد كل ده .. راجع يا غالى !
و ابقى قابلني لو سؤال وقف قدام سيادتك.

مع تمنياتي لكم بالنجاح و التوفيق يا شباب

انا يا جماعة مش طالب منكم حاجة غير انكم تدعولى لانى انا عندى امتحان الترم السبت القادم وربنا يوفق الجميع ودى هدية بسيطة منى بمناسبة الامتحانات يارب تعجبكم

: كلام مهم عن المذاكرة وسريع .... ولو نفذت ابقى قابلنى لو كلمة وقفت امامك فى الامتحان باذن الله 2omndl8

: كلام مهم عن المذاكرة وسريع .... ولو نفذت ابقى قابلنى لو كلمة وقفت امامك فى الامتحان باذن الله F2Y20089

يارب نقدر ننفذ ول نصفها
teslam

كلام جميل اوى يا خالد
وياريت فعلا نقدر ننفذه
وربنا معانا كلنا يارب

teslam

ميرسى ليكى يا نورهان على مرورك ان شاء الله يا محمد انت ونورهان باجد والعمل نفدر ننفز الكلام دة ويارب يوفقنا جميعا ان شاء الله teslam

يسلم مرورك يا وليد : كلام مهم عن المذاكرة وسريع .... ولو نفذت ابقى قابلنى لو كلمة وقفت امامك فى الامتحان باذن الله 784967

» ادعية مستجابة باذن الله من دعى بها فرج الله همه
» لو الرسول صلى الله عليه وسلم امامك؟
» هل فكرت في معنى كلمة: سبحان الله وبحمده
» لو وقفت قدام ربنا دقيقه هتقوله ايه
» الامتحان لا دين له