رئيس جمهورية كده وكده !!!!!

[size=24]

بسم الله الرحمن الرحيم
تخيّل
تعالى نتخيّل
يا عم انت حتدفع حاجة من جيبك ؟
الحلم ده على حسابي
غمض عينيك شوية واحلم انك بقيت رئيس البلاد
متقولش ازاي؟.. مش مهم
زورت الانتخابات.. او قلت للناس انتخبوني احسن ارمي نفسي من فوق البرج فصعبت عليهم قاموا انتخبوك.. او يكون لك واحد صاحبك امريكاوي بتكلمه على الياهوو وقال اوباما انك ولد مجدع ورجولة وكفاءة وانك من بتوع العولمة والعوالم والنظام العالمي الجديد لانج.. ومش من اللي بيصلوا الفجر جماعة.. فوافق بوش انك تقعد على... الكرسي
المهم انك بقيت دلوقتي رئيس البلاد
*********
رئيس الدولة مين قدك يا عم؟
هتاكل طعمية مقلية بزيت فرنساوي وربناهيتوب عليك من طعمية ام احمد المقليّة بزيت العربيات
وهتتعالج من انيميا الفول.. الفول الجديد بقه يا عم من غير سوس
وابقي قابلني لو لقيت اي مسمار في العيش.. هتاكل عيش من ابو الرغيف بربع جنيه. 0 هو دلوقتى بقى بنص جنيه). سخن وطازة وطري.. تخيل.. طري مش زي العيش اللي انت كنت بتاكله وانت بتشرب كوباية ميه ورا كل لقمة علشان تنزل
لا لا.. العيش ابو شلن ده اللي انت كنت بتجيبه من الفرن وعقبال متوصل بيه البيت يسلجم ويقفع ويعرقص (من غير ما تسألونى يعنى ايه).. وتعاقب عليه دولياً لأنه اصبح من اسلحة الدمار الشامل.. لا انسى الكلام ده
الاوضاع هتتغير خالص ياعم.. دا انت ربنا هيكرمك خالص والله العظيم
طب بص دي.. هتاكل لحمة.. متبرّقش أوي كده.. مش عارف يعني ايه لحمة؟
( همّا هيقولولك )
وبعدين انت مش كنت بتسمع وانت قاعد على القهوة وحاطط رجل على رجل وصباعك طالع من الجزمة.....هههههههههههه.... انهم هيستوردوا حاجة كده من السودان واثيوبيا
آه فاكر ؟
أهي هي دي اللحمة
لا لا مش اللي انت كنت بتاكلها في العيد ، بتاعت العيد دي اسمها كرشة.. متفضحناش بقه الله يسترك
*********
وهيبقى فيه كنتاكي.. متسألش.. دي فراخ.. يعني هتودع عم لطفي الفرارجي اللي كان بيعين لك رجلين الفراخ وانت كنت بتقول له عشان الكلب.. وكان ساعات يفوّتلك حتتين قنصة على حتتين كبدة من بتوع الزباين اللي بيستحموا بصابون اجنبي
وهتشرب السيجارة كلها مرة واحدة.. يعني مفيش تخميس
وبعدين دي سجاير ستراكي سترايك من بتاعت الست ماري منيب.. جو تاني
بس لما يخدوك علشان تحلف اليمين
ياعم دا غير يمين الطلاق اللي انت مصدره في كل حدوتة تحكيها
اصحي معايا الله ينجيك
لما تروح تحلف اليمين اوعى تروح بالبدلة بتاعت جوازك.. انت عارف.. دي بقت مكيفة الهواء من كل ناحية.. جاركم العربى جوز ام بطه (وحاسب م الانفلونزا) عنده بدله اخوه باعتها له من بلاد بره ابقى استلفها منه وإقضي مصلحتك وبعدين رجعهاله.. ماهي الجيران لبعضها امال ايه
وحياتك كمان يا شيخ ماتروح بالجزمة بتاعتك.. عشان خاطري ابقى اشتريلك جوز جزمة من بيع المصنوعات دي رخيصة هناك.. لأن الحدوة اللي انت مركّبها في كعب الجزمة بتعمل صوت قلق برضه.. وبعدين ممكن الجهاز يصفر عليك تبقى حكاية.. فاهم ؟
اول يوم بس وبعدين همّا بعد كده هيتصرّفولك في جوزين جزم مستوردين عشان تقابل بيهم اصحابك بتوع الدول التانية
*********
وهتنام على سرير عليه مراتب.. المراتب دي بقه جواها قطن
ايوة قطن.. والله العظيم قطن.. ايوه تمام زي القطن اللي انت جبته من الاجزخانة للواد حودة ابنك لما الواد شحته ابن ام بيسة لزقه بالطوبة في دماغه فتحهاله
وجريت بيه على المستشفى قالولك هات لنا قطن وشاش وميكروكروم (كنت باحب الميكروكروم ده وانا صغيره عشان مش كنت باعرف انطقه)وصبغة يود وبلاستر وسرنجة وحقنة تيتانوس وكيس دم واقطع تذكرة بخمسة جنيه من شباك العلاج المجاني
ايوه هو ده القطن.. فهمت ؟
هتحلم احلام نضيفة على السرير دا يا عم الحاج
افرد طولك.. متخافش رجليك مش هتطلع برة الاوضة.. انت مش في بيتكم دلوقتي.. افرد افرد
غمّض عينيك كده
غمّض
*********
ايه؟.. انت نمت ؟
اصحى يا عم.. اصحى.. الباب بيخبط
الحق.. موظفين الكهربا على الباب
الحق دول جايين يشيلوا العداد علشان بقالك 3 شهور مدفعتش الفاتورة
*********

انا مليش دعوة بالكلام ده انا بهزر هههههههههههههههههههه

هههههههههههههههههههههههههههه
موضوع رائع جميل جدا

موضوع جميل بس كل واحد رئيس جمهوريه نفسه دلوقتى

انا مش عاوز ابقى رئيس

واانا هرشحك يا اسطوره

موضوع جميل بيحسس الناس الغلبة بالذل والمهانه برغم انه موضوع ساخر

شكرررررررررررررررررررا يا تيجر

» ((المسحراتي.. رئيس جمهورية سهر الليالي في شهر رمضان))
» أخبار..أهرام..جمهورية‏
» أخبار..أهرام..جمهورية
» لقد قام الرئيس مبارك بالكثير والكثير من الانجازات من جمهورية مصر العربية ومنها :-......
» جمهورية الكونغو تسقط موريشيس وتحقق فوزها الاول بالتصفيات الافريقية