أهو الأمل والمال

ما طاوعت نفسي لو أنك عذلتها = يا العاذل الي كل همك نمايم

لياك تنقل لي هروج جمعتها = في غير نور العين ما نيب هايم

الناس وأغلى الناس لجله تركتها = الغالي الي فيه ما طيع لايم

لو مالت عيوني لغيره عسرتها = قلبي معه مخلص شديد العزايم

روحي وما تملك لخلي رخصتها = أهو الأمل والمال وهو الغنايم

أغلى الذهب والماس كني كسبتها = بحر السعادة غارقاً فيه عايم

صدفه علي جادت ولا قد صدفتها = جادت علي في يوم عطر النسايم

دنيا الهوى والحب عقبه عرفتها = واصبح معه شفي بدنياي دايم

صورة خياله فوق عيني ولفتها = أعيش أنا والطيف والكل نايم

احروف كل اسمه بقلبي كتبتها = مكتوب وسم الحب وأغلى الوسايم

طالبك يا ربي ومنك طلبتها = جمع الشمل لهل القلوب الهوايم