الدقروماطية !!!!!

مش شرط اطلاقا ان كل الناس تكون بتفهم سياسة !!! ما هو مش كل الناس يعني في موقف اتخاذ قرارات من شأنها تغيير خريطة البلاد الاقتصادية و الاجتماعية و السياسية ,, مش شرط خالص
على الرغم بقه من انه مش شرط الناس كلها تفهم بس الاكيد ( وبالذات في مصر ) ان الناس كلها بتتكلم , حق مكفول من حقوق الانسان انه يبقى ليك توجه سياسي ,بس على الاقل تكون فاهم و انت بتتوجه سياسيا الى اي جهة انت رايح !!! الناس عندنا في مصر محللين سياسيين بارعيين ,, بس معظمهم كلامنجية على الفاضي!!!!!!!
الحل في البرادعي!!!! كلمة بسمعها كتير قوي اليومين دول ,, الغريبة اني بسمعها من طبقات سياسية شديدة الاختلاف ,, بتنرفزني قوي الكلمة دي ,, مش لاني في موقف اختلاف مع البرادعي او حاجة بس لاني متأكد ان معظم المتشدقين بالبرادعي دول مايعرفوش مين هو البرادعي ,, ما سمعوش حاجة عن اجندتة السياسية او توجهاته او افكاره الاقتصادية او او او .. كل اللي الناس عارفاه انه كان حاجة مهمة تبع حاجة كده (مهمة برده) بتدور على نووي في البلاد اللي بتغضب عليها امريكا!!!! و يبقى (عندهم) الحل في البرادعي.
جميل انك تكون صاحب فكر !! بس لو مانتاش صاحب فكر عادي يعني ما حصلش حاجة ,, لو انا قلتلك انا ما بفهمش في السياسة مش هسقط من نظرك و لا حاجة ؟؟ بس ازااااي ؟؟ لازم اتأنتك كده و انا قاعد بشد في حجر المعسل وترميلك بقين عن اي حاجة ,, عن الحكومة ,, عن الريس ,, عن امريكا ,, عن اسرائيل ,, اي حاجة ,, حتى لو انتا معلوماتك عن اللي بتتكلم عنه ده لا تساوي اكتر من واحد على عشرة!!
لفت انتباهي قوي في فيلم (دكان شحاتة) بكر و هو في الانتخابات بيروج لصالح مرشح يعد بالدقروماطية ( اللي هي الديموقراطية ) لفت نظري تهافت الناس عليه جدا و اهتمامها الشديد بالخطيب !! صحيح يمكن يكون ده مجرد خيال مؤلف او ابداع مخرج على شاشة سينما ,, بس يبقى الشاهد انه اللي بيفتي في امور السياسة ممكن بجهله يستقطب ناس و الناس تستقطب ناس و يأثروا فعلا (بجهلهم برده) في الوضع السياسي و الاقتصادي في البلد ,, لو مش مصدقني شوف النواب في مجلس الشعب (اكيد مش كلهم) شوف مستوى البعض منهم فكريا و خلقيا , وشوف مين كان وراهم في الانتخابات ؟؟ هتفهم الدنيا ماشية ازاي.
(يطلع حسني و ينزل عبد الملك و يرمي احمد فتحي في نص الملعب) الجملة دي ممكن تسمعها من مدرس فيزيا او طبيب اسنان او نقاش او او ... , معقول كل الناس فاهمة كورة و مع ذلك الوحيد الي ما بيفهمش هو المدير الفني للفريق؟؟؟؟ يا جماعة لو بجد كلامكم مش هيأثر في ملعب الكورة ,, فبجد وارد جدا انه يأثر في ملعب اهم و اهم ميت مرة .. ملعب الحياة السياسية!!
الفتايين بيشجعوا مصر
واحنا (مضطرين) معاهم!!!!!!

عندك حق بجد
كل كلامك صح