الكيف !!! .............

صوت ام كلثوم وعبد الحليم , عبد الوهاب , منير , شيرين .... الخ كيف
كوباية الشاي , الكابتشينو , النسكافيه ...كيف
الضحكة الحلوة , القعدة الحلوة , الاكلة الحلوة .... كيف
انا عارف بس مش هوا ده الكيف اللي قصدته خالص : الكيف اللي قصدته هو الكيف اللي بالي بالك , الكيف اللي بيودي سعادتك في داهية مع اهلك و مراتك ,, الكيف اللي بخسرك فلوسك و صحتك , الكيف اللي بيشقلب كيانك و بينسيك حباتك و اهدافك ,, الكيف اللي بيزعل الداخلية منك :)
و يبقى الاهم : الكيف اللي بيغضب ربنا ............ الكيف
قبل ما نتكلم عن سيكولوجية الكيف لازم نعرف ان المخ زي ما بيتحكم في وظائف حيوية كتير و زي ما بيتحكم في الحواس و الكلام و التفكير .. بيتحكم كمان و بصورة معقده في حالتك النفسية عن طريق مواد كتير و سبحان الله
علاقة معقدة جدا بين ال DOPAMIN و ال MAOI و غيرها من المواد ممكن اي زيادة ولا نقص في اي مادة يخلوك سعيد او سعيد قوي (EUPHORIA) او حزين او حزين قوي (DEPRESSION) معقد معقد المخ البشري..
سيكولوجية الكيف بقه بتتلخص في الاتي : رغبة سادية للشخص في التحكم الكامل في حالته النفسية ,, مش عارف يتعامل مع نفسيته في كل حالاتها ,, كل تقلباتها ,, مش شرط انه بيشرب عشان زعلان او مبسوط او فاضي او مهموم او او ... الخ , الشخص ده بيشرب عشان يشرب !!!!
انا ضد فكرة الكيف للهروب .. معظم الكييفة (لامؤاخذة) معندهمش اصلا قضية عشان يشرب و ينساها .. كمان ضد فكرة الغلطة والادمان : عشان معظم الكيوف مالهاش ادمان جسدي واضح !!!
الاغرب و الاغرب : هو حالة الاصرار العجيبة اللي بتيجي للكييف عشان ينزل من بيتهم و يدور على تاجر و من تاجر لتتاجر و من عصابة لعصابة و يتغرم تليفونات و بنزين و يتحمل خطورة لا حدود لها بيعمل ده كله بحماااااااس منقطع النظير و أصرار و عزم لو سلطه في حاجة مفيدة ممكن يعمل عمارة في كام شهر!!!
قصاد حالة الاهتمام الشديدة دي تلاقي حالة من اللامبالاه الغريبة لاي شيء تاني : لامبالاه لعلاقتي بربنا لصحتي لفلوسي لاسرتي لمراتي لولادي لمستقبلي !!!!!!!!!! تناقض غريب!
من وجهة نطري ان الكييف ده اختار انه يؤدي دور الملك في مسرحية , بس المسرحية دي كل الجمهور و النقاد فيها واحد بس : نفسه!
انا ملك نفسي !! و الملك ماينفعش يعني و هو ملك انه يهتم بكل الحاجات اللي في الدنيا ,, ما ينفعش يهتم غير بالمملكة الوهمية اللي عملها لنفسه !! ماينفعش يطلع من الدور اللي اختار انه يبيع الدنيا كلها عشان يمثله.
لو انتا كييف .. لو اخوك ابنك قريبك صاحبك !!! لازم تعرف او تعرفه انه ملك مخدوع و ان نجاحه في اختراق القانون (الممتع) و كمان نجاحه في التحكم الوهمي بحالته النفسية دا مش نجاح دا فشل و فشل ذريع كمان .
انا مش مصلح اجتماعي (و لو انني نفسي ابقى كده) و مش عايز اتكلم عن المخدرات لمجرد اني اقولك دي وحشة دي مضرة دي كذا دي كذا .. مانتا عارف انها وحشة و مضرة و كذا و كذا .. انا عايز اقولك ما تضربش نفسك بايدك على قفاك!! ما تمثلش دور في مسرحية كل جمهورك هو واحد عبيط جواك خايف من كل حاجة و بيصقفلك زي الاهبل عشان تكمل تضييع نفسك يااااا يا ملك!
الملك الحقيقي هو اللي بارادته و نجاحاته الحقيقية بيقدر يسيطر على حياته هو اللي بيعرف ان الوصول للسعاده محتاج كفاح و الم و نضال عشان يبقى نجاح حقيقي , وصدقني ساعتها ال EUPHORIA اللي هتوصلها احلى احلى احلى بكتير من اللي بتديهالك سيجارة ملفوفة , ولا حجر معسل و لا سطر ولا حباية
اصحى المسرحية خلصت