العريس جه...وخلع

العريس جه ...... وخلع

هتعملى ايه لو جاتلك واحده من صحباتك وقالتلك "جبتلك عريس" والمطلوب منك مقابلته للتعارف بينكم،

هنشوف اربع قصص مع بعض وانتوا ليكوا الحكم



اول قصه ))


"شكلي، ثم شكلي، ثم شكلي".. ده الى عملته "هند" في مقابلة أول عريس، كان إهتمامها الأوحد هو مظهرها وازاى تبقي جميله، "عرفت موعد المقابلة قبلها بأسبوع، ومنذ عرفت لم يشغلني غير هلبس إيه، والماكياج يكون إزاى، وبدأت بجمع كل ما يعجبنى من ملابس وماكياج من أخوتى وأصحابى، وفي يوم المقابلة، إتصلت بصديقتي، أدعوها للحضور لمساعدتي، وبالفعل بقيت على (سنجة عشرة) وذهبت للمقابلة، وحدث ما لم أتوقعه، أول ما شفت العريس إتكسفت ووشى جاب ألوان، ومعرفتش أتكلم ولا كلمة، اللي صدمني أكتر سؤاله لي: هو أنتِ عندك فرح النهاردة؟.. وكأنه لم يستوعب أن كل ما فعلته في مظهري كان من أجل مقابلته بشكل أنيق.. وباظت الجوازة".


تانى قصة )))


"علا" ليها رأي مختلف تماما، فهي شايفه ان الى بيميز البنت عن التانيه هيا شخصيتها "" لذا كان عليها أن تبذل كل ما في وسعها لإبراز هذه الشخصية، فحكت لنا تجربتها في لقاء اول عريس قائلة: "لم تشغلني الجوانب الشكلية كثيرا، روحت لمقابلته بملابسي العادية، اتكلمنافي موضوعات عديدة، إلى أن طلب مني عدم العمل بعد الزواج، فرفضت بشدة، وحولت المقابلة إلى ندوة عن حق المراة في العمل.. ومشوفتش وشه تانى ".




تالت قصة)))


وبالنسبة لـ "ندى"، فقد فعلت كل المطلوب منها، ظهرت بشكل أنيق غير مبالغ فيه، تكلمت بأسلوب لطيف، لكن في نهاية المقابلة تقمصت دور الأب، وبدأت توجه له الأسئلة:"مرتبك كام؟ والشغل الإضافي بتكسب منه قد إيه؟ وهتجهز الشقة منين؟ وبعد الجواز مين هيمسك مصروف البيت؟".
وطبعا فر العريس وكان رأيه فيها معروف "إنسانة مادية وماتناسبنيش".



رابع قصة)))


"نورهان"، من أصحاب شعار"الصراحة راحة"، والذي رفعته عند لقاء أول عريس، تقول: "ليه ماكياج؟ بعد كده هيشوفنى وأنا لسه صاحية من النوم، ساعتها بقى يقول كانت بتخدعني، وليه أستلف لبس من أصحابي عشان أقابله؟ افرضوا عجبه اللبس اللي أستلفته، وطلب مني ألبسه تاني، أعد بقى أستلفه كل شويه؟.. رحت قابلته بطبيعتي، وإتكلمت معاه بتلقائيتي، لكن الظاهر إن تلقائيتي ما عجبتهوش، قالي أنتِ راجل ولا انا ، الكلمة ضايقتني طبعا، لكني بعد كده أقنعت نفسي إني صح، وتمسكت أكتر بطبيعيتي".


من خلال القصص دى
عاوزه اعرف اللى بقت على طبيعتها معجبتشى
اللى اتزينت وخلت نفسها احسن فى الشكل برده معجبتشى

طيب المفروض ايه اللى يتعمل

موضوع قمة فى الروعة يا لولو بجد بشكرك جدا بس هو اكيد اهم شىء فى البنت الاحترام والأدب
ميمنعش مظهرك انه يكون لطيف بردو دى شىء ضرورى
المهم بقى يا ستى انك جمعتى كل اسمائنا ندى ونورهان هههههه مش ملاحظة

ههههههههههههه
صح يا دودى
مجمع كل الحبايب

وطبعا اهم حاجه فى البنت الادب والاخلاق
مشكور يا دودى ع المرور
وعاوزكى دايما منوره فى المنتدى

موضوع شيق
وانا لما احب اخطب واروح احب اشوف الواحدة على طبيعتها واحب انها تشارك الرئ

وتكون فى نفس الوقت انيقة برجة ومهتمية بنفسها يعنى متقومش من النوم وتيجى تقبلنى فى اول مرة

وبردة متحطش مكياج يعنى كأن قاعدة مع نفسها تغسل العادى وتلبس العادى وبلاش مبالغة
موضوع جميل لؤلؤة

موضوع جميل اوى يالؤلؤه وتسلم أيدك
أنا مش عارف أقول أيه أصل أنا متزج بس عن حب
المفروض أن الوحده تكون على طبيعتها وتتعامل معاه عادى جدآ علشان هيكون فى عشره بين الاثنين
أما المظاهر والشخصيه والميكياج أشياء مش ضروريه المهم تفكر الاول هانبداء حياتنا فى الاول ازاى ومع العشره والزمن هتعرف اسلوبه وبعدها تحدد بيحب المظهر ولا ولا
بيحب الميكياج ولا لا بيحب البنت يكون عندها شخصيه وفى اى موضوع
دى كانت وجهة نظرى ممكن البنات لهم راى تانى

وائل القصاص كتب:

موضوع شيق
وانا لما احب اخطب واروح احب اشوف الواحدة على طبيعتها واحب انها تشارك الرئ

وتكون فى نفس الوقت انيقة برجة ومهتمية بنفسها يعنى متقومش من النوم وتيجى تقبلنى فى اول مرة

وبردة متحطش مكياج يعنى كأن قاعدة مع نفسها تغسل العادى وتلبس العادى وبلاش مبالغة
موضوع جميل لؤلؤة

مضبوط كلامك يا استاذ وائل
تبقى مهتميه ان يكون مظهرها كويس
بس مش لدرجه البهرجه فى منظرها
اهم حاجه فى الموضوع انها تكون على طبيعتها
ومتحاوليشى انها تجمل

مشكور ع المرور يا استاذ وائل

زكريا العشة كتب:

موضوع جميل اوى يالؤلؤه وتسلم أيدك
أنا مش عارف أقول أيه أصل أنا متزوج بس عن حب
المفروض أن الوحده تكون على طبيعتها وتتعامل معاه عادى جدآ علشان هيكون فى عشره بين الاثنين
أما المظاهر والشخصيه والميكياج أشياء مش ضروريه المهم تفكر الاول هانبداء حياتنا فى الاول ازاى ومع العشره والزمن هتعرف اسلوبه وبعدها تحدد بيحب المظهر ولا ولا
بيحب الميكياج ولا لا بيحب البنت يكون عندها شخصيه وفى اى موضوع
دى كانت وجهة نظرى ممكن البنات لهم راى تانى

انا بتفق معاك
لانه مسييره هايشوفها من غير مكياج
وبعدين الطبيعى احلى بكتير من المكياج